AB100 musika, arte bisualak eta sorkuntza kolektiboa uztartzen dituen topaketa da, Aaron eta Bryce Dessner musikarien 50. urtebetetzea ospatzeko sortua. Programak urteetan zehar beren ibilbideak gurutzatu dituzten artistak, idazleak eta kolaboratzaileak bilduko ditu Donostian eta Biarritzen, adiskidetasun-loturak, truke artistikoa eta partekatutako sorkuntza-prozesuak ospatzeko.

Asteburuan zehar, kontzertuak, performanceak, topaketak eta arte bisualetako proposamenak egingo dira bi hirietako hainbat espaziotan. Tabakalerak bat egingo du programarekin Ragnar Kjartanssonen A Lot of Sorrow lanaren proiekzioarekin —The National protagonista duen sei orduko performance-filma— eta Ludmilla Balkisen Voices Within soinu-eskulturen instalazioarekin, Bryce Dessner eta Julien Chaillourekin elkarlanean sortua.

Eskultura hauek ez daude isilik

Zeramikazko pieza bakoitzaren barruan ezkutatutako emakumeen ahotsek arnasa, memoria eta oihartzuna gordetzen dituzten ontzi bihurtzen dituzte obrak. Entzuteak ikusteak bezainbesteko garrantzia hartzen du, bisitariak distantziak, mugimenduak eta ontziek eurek eraldatutako soinu-paisaia aldakor batean zehar mugitzen diren bitartean. Zeramikak bere baitan hartzen du ukiezina den hori, ahotsei bizileku fisiko bat eskainiz. Ahotsek, berriz, barrutik biziarazten dituzte eskulturak. Elkarrekin, presentzia eta absentzia aztertzen dituzte, eta arretaz entzutera gonbidatzen gaituzte, ikusezinak diren munduak hautemateko modu gisa.