Bilboko Udaleko Bidebarrieta Kulturguneak "XXI. mendeko literaturarekin elkarrizketak" programaren edizio berri bat hartuko du gaur asteartean, urriak 20. "Eguneroko izugarrikeria" izeneko solasaldiak Monica Ojeda eta María Fernanda Ampuero idazle ekuadortarrak bilduko ditu gai honen inguruan hausnartzeko, Alicia San Juan kazetariaren moderazioarekin.

Bidebarrietako Liburutegiko Ekitaldi Aretoan egingo da literatur hitzordu hau, 19:00etatik aurrera. Sarrera doan izango da, eta Bidebarrieta Kulturguneko YouTube kanaletik streaming bidez emango da.

"Eguneroko izugarrikeria" topaketak ekuadortar literatura garaikideko bi ahots nabarmenen arteko topaketa proposatzen du, Mónica Ojeda eta María Fernanda Ampuero, errealitatea esploratzeko modu indartsu bat beldurrezko gaietan aurkitzen duen idazkera batek elkartuta. Bi egileak egoera ezagunetatik abiatzen dira — familia, haurtzaroa, harreman afektiboak, gorputza, indarkeria edo desberdintasun sozialak —, eguneroko bizitzaren itxurazko normaltasunaren azpian ezkutatuta dagoena azaleratzeko.

Elkarrizketan zehar, bi egileen lanak zeharkatzen dituzten gai batzuetara hurbilduko da publikoak, eta izua, asaldura eta groteskotasuna beren kontakizunetan nola txertatu dituzten azalduko dute. Neurri batean, bere liburuek espazio intimo eta familiarrak agertoki bihurtzen dituzte, non gizarteak sarritan begiratu nahi ez dituen beldurrak, zauriak eta indarkeriak azaleratzen diren.

Izan ere, bi idazleak "Andeetako gotikoa" izeneko korronte literarioaren barruan sartzen dira, gaur egungo korronte literarioa, izuaren eta fantastikaren estetika Andeetako geografia, mito eta tentsio sozialetara egokitzen duena.

Monica Ojeda (Guayaquil, Ekuador, 1988) idazle eta Latinoamerikako literatura garaikidearen ahots nabarmenetakoa da, beldurrezko narratiba ikuspegi poetiko batetik berritzeagatik eta ezbeharraren, indarkeriaren eta tabu sozialen mugak arakatzeagatik aitortua. Gizarte Komunikazioan lizentziatua eta Literatur Sorkuntzan eta Kulturaren Teoria eta Kritikan masterra egina, "La desfiguración Silva" (2014) nobelarekin egin zuen debuta, ALBA Narrativa saria jaso zuena, eta nazioarteko ospea sendotu zuen "Nefando" (2016) eta "Mandíbula" (2018) lanekin, Mario Vargas Llosa Eleberriaren Biurteko Sariko finalista. 2019an Príncipe Claus Next Generation saria jaso zuen, eta 2021ean, Granta aldizkariak espainiar narratzaile gazte onenen artean aukeratu zuen.

María Fernanda Ampuero (Guayaquil, Ekuador, 1976) idazlea eta kazetaria da. Literatura ikasi zuen, eta kazetaritzari eta kronikari lotutako ibilbide profesionalari ekin zion. Esperientzia horren ondorioz, "Lo que aprendií en la peluquería" (2011) eta "Permiso de residencia" (2013) liburuak argitaratu zituen, batez ere migrazioan eta esperientzia pertsonaletan oinarrituta. 2015ean, Hijos de Mary Shelley saria jaso zuen, eta 2016an, Cosecha Eñe saria, "Nam" kontakizunagatik, baina "Lucha de gallos" (2018) lanarekin, Joaquín Gallegos Lara saria irabazi zuen, eta nazioarteko aintzatespena lortu zuen. Bere liburuak hizkuntza askotara itzuli dira eta Latinoamerikako narratiba berriaren funtsezko egileetako bat bezala kokatu dute.

Alicia San Juan (1967) Kazetaritzan lizentziatu zen EHUn, eta bere ibilbidea batez ere irrati, telebista eta kultura arloetan garatu du. Radio Euskadin programak, magazinak eta kultur espazioak egin eta editatu ditu, eta, horrez gain, musikari lotutako ibilbide garrantzitsu bat garatu du, Chico y Chica pop elektronikoko bikoteko kide gisa. Gaur egun Voces en el jardín irratsaioa eta podcast-a gidatzen ditu, Consonni argitaletxeak ekoitzia.

BIDEBARRIETA KULTURGUNEA Bidebarrietako Liburutegiak kultura zabaltzeko duen gunea da.

• Bertaratzerik izan ezean, aurkezpena streaming bidez jarraitu ahal izango da Bidebarrieta Kulturguneko YouTube kanalean.