Euskal Museoa Bilbaok hitzarmen bat sinatu du AIKO Taldearekin, euskal musika eta dantza tradizionala zabaltzeko egitekoan erreferentea den elkartearekin, hain zuzen, zertarako eta euskal kultura ondarearen erreferentea den espazio horretan euskal dantzaren ezagutza, praktika eta transmisioa sustatzeko.

Hitzarmena ondokoek sinatu dute: Xabier Payak, Euskal Museoa Bilbaoko zuzendari nagusiak, eta Sabin Bikandik, AIKO Taldearen ordezkariak. Hala, lankidetza-akordio bat formalizatu dute, euskal dantza tradizionala herritar guztiei hurbiltzeko jardueren programazio egonkor bat sortzeko. “Gure konpromisoa mota honetako lankidetza gehiago lortzea da, hainbat kultur erakunderen eskutik, helburu batekin: Euskal Museoa bizirik dagoen museoa izatea, eta euskal kultura da bere ardatza, ondare materiala eta inmaterialaren aberastasuna uztartuz, eta berori ezagutu, praktikatu eta gozatzeko aukera emanez “, azaldu du Xabier Payak.

Hitzarmenak Euskal Museoa Bilbaoren misioa indartzen du, patrono dituen Bilboko Udalaren eta Bizkaiko Foru Aldundiaren helburua ere badena: euskal kultura ondarea kontserbatzea, ikertzea eta zabaltzea, eta, horrez gain, euskal nortasuna osatzen duten tradizioen eta herritarren arteko topaleku berriak sortzea.

Dantzarekiko konpromisoa 

Akordioaren xedea honako hau da: Euskal Herriko zazpi lurraldeetako —Araba, Bizkaia, Gipuzkoa, Nafarroa, Lapurdi, Behe Nafarroa eta Zuberoa— dantza tradizionalen ezagutza eta praktika sustatzea, eta, modu horretan, belaunaldi berrien arteko transmisioari bide egitea eta eguneroko jarduera kultural eta sozial gisa dantzak daukan presentzia indartzea.

Alde batetik, AIKOk irakaskuntzaren arloan eta arlo artistikoan daukan eskarmentua ekarriko du, Museoaren barruan programazio jarraitu bat garatzeko; bestetik, Euskal Museoa Bilbaok bere espazioak eskainiko ditu eta jarduera guztiak sustatuko ditu, euskal ondare immaterialaren alderdi hau ahalik eta jende gehigorengana iritsi dadin lortzeko.  

Euskal dantzak ikasteko eskolak astero Euskal Museoa Bilbaon

Hitzarmena sinatzen denetik aurrera, publikoak eskola-programa egonkor batean parte hartzeko aukera izango du. Eskolak urritik ekainera bitartean eskainiko dira, astelehen eta asteartenero, Museoan bertan, jaiegun diren egunetan izan ezik. 

Astelehenetan· Helduak

• 18:30 – 19:30: Hastapen-eskolak
• 19:30 – 21:00: Hobekuntza-eskolak.

Talde bakoitzean 40 pertsona egongo dira gehienez. 

Izen-ematea: 20 €/hilabete (www.aiko.eus) 

Astearteetan· Gazteak, 18 eta 30 urte bitartekoak

• 18:30 – 19:30: Hastapen-eskolak
• 19:30 – 21:00: Hobekuntza-eskolak.

Doako parte-hartzea. 

18 eta 30 urte arteko gazteek doan eman ahalko dute izena. Gainerakoek 20 euro ordaindu beharko dituzte hilean. Erabaki hori hartu da gazteen artean euskal dantzak sustatzeko eta espazio paregabe batean jarduera mota horretaz gozatzeko. 

AIKO Taldeak kudeatuko ditu izen-emateak www.aiko.eus webgunearen bidez.