Debak "Ni naiz naizena" argazki-erakusketa jasoko du urriaren 1etik 15era eta ikusgai egongo da erakusketa gelan, Udalak bultzatutako LGTBIQ+ programazioaren baitan kokatuta.

"Ni naiz naizena" izen bereko webserieko kapituluak grabatu ondoren sortu zen. Proiektuan zehar egindako argazkien eta parte-hartzaileen testigantzen bidez, trans* pertsonek beren egunerokotasunean dituzten bizipenak, erronkak eta zailtasunak hurbildu nahi dizkio publikoari.

Horretarako, trans* pertsonek Latinoamerikan eta estatu espainiarrean bizitako errealitate ezberdinak biltzen ditu erakusketak, beren historia pertsonalak erakutsiz eta identitate eta ibilbide aniztasunean fokua jarriz.

Proiektua Gehitu eta Mugen Gainetik elkarteen arteko lankidetzatik sortu da. Elkarte horiek giza eskubideen defentsan eta eraldaketa sozialean lan egiten dute eta erakusketa modu ibiltarian eskaintzen diete erakunde eta elkarteei, eduki horiek herritarrei hurbiltzeko helburuarekin.

"Ni naiz naizena" ekimenaren helburu nagusia da arauz kanpoko genero-identitateak dituzten pertsonen errealitateak eta identitateak ikusaraztea eta normalizatzea, aniztasunetik ezagutza, errespetua eta bizikidetza bultzatuz.

Erakusketa Gehitu-k egindako lanaren barruan kokatzen da. Elkarte hori 1998an sortu zen, LGTBI+ pertsonen eskubideen erabateko onarpena bultzatzeko eta sexu-orientazioagatik edo genero-identitateagatik edozein diskriminazio moduren aurka borrokatzeko. Erakundeak sentsibilizazio- eta eskubideen defentsa-programak garatzen ditu hainbat arlotan, hala nola hezkuntzan, komunikabideetan eta erakundeekin eta beste gizarte-erakunde batzuekin lankidetzan.